Döschkassen

EU-schi un AK-47

Dat is di wat. De Zeidung mit de veer grooten Bookstoben hett Middeweeken titelt: „Wunderbar, Ursula“, weil Uschi vun de Leyen mit negen Stimmen Mehrheit niede EU-Chefin worrn is. Aha!?

Ward een mit 85 Perzent to’n Parteichef wählt, schrievt datsülbige Blatt wat vun Afsturz un veels to weni un so. Na jo. Mutt man ni verstohn. 

Ick heff dor je overs al mit reekend, dat uns‘ ole Kommandantin, den Posten in Brüssel kriegt. Weer je klor, weil se op’t Letzt‘ je doch seggt hett, wat se de CO2-Emmision‘ „bet 2030 üm 50 wenn ni sogor 55“ Perzent dohlkriegen will. Un wenn Uschi dat seggt, denn deiht se dat. Bi de Bunneswehr hett se dat je ook trechkreegen. Dor fohrt meist keen Panzer mehr, de Fleegers heevt ni mehr af oder se funktschoneert ni richti – de Trupp verbrennt nu veel weniger Diesel un Kerosin as vörher, un de Luft blifft rein. So mokt man dat. Un so radikal künnt de Greun‘ gor ni dinken. Dörüm weern se ook so neidisch un wulln vun de Leyen ehr Stimm ni geeven. „Dat Thema mit de Umwelt heuert uns to“, hebbt se wohrschienli achter verslotene Döörn jault. Overs nu mööt se dat nehm‘ as dat kom‘ is. 

Kunn angohn, dat vun de Leyen dat Licht in de EU bet 2030 al ganz un gor ut hett, wenn se Ernst mokt. Dat eenzige, wat mi komisch vörkümmt, is, dat Uschi de Gorch Fock ni al lang weller op’t Woter hett. Dat Segelboot fohrt doch tomeist mit Wind, also regenerative Energie. Na jo, man mutt je ook Prioritäten setten, ne. Jo, dat is tatsächli allns wunner-bor. As ick nömli an Middeweeken de wiederen Norichen leest heff, dor heff ick mi nömli so dull wunnert, dat mi meist de Kaffe ut de Hand fulln is. Wo kümmt Merkel denn dorop, Anne Kramp-Karrenbuuer de oln Schullerstücke vun Uschi an’t Kostüm to neihn? Gnadderi kieken langt, wat ick weet, ni, üm Verteidigungsminister to ween. Dat ward AKK wohrschienli ook bald rutfinnen. Over nu is dat even so. Ut Flinten-Uschi is EU-schi worrn. Un wat ut AKK nu AK-47 oder eher 08/15 ward, dat kriegt wi je noch to seh’n...

In düssen Sinn