Podkassen

Muulwörp sünd ni politisch!

De Muulworp (Maulwurf) is vun de Düütsche Wildtier-Stiftung to’n Tier vu’t Johr 2020 ernennt worrn. Oogenblick mol – 2020 is je noch gor ni! Hebbt se bi düsse Stiftung keen Kalenner an de Wand? Dat is je meist so, as wenn man de DDR 1989 to dat beste Land 1990 ernennt harr. Dat Johr hett de DDR je gor ni dörholn.

Dormit, irgendwat to dat Beste vun’t näste Johr to verklorn, schull man also bannig vörsichti ween. 

Wenn wi nu overs al mol bi’t Thema sünd: Morn is dat je genau 30 Johr her, dat de Muuer fulln is. Düsse Muuer, de Walter Ulbricht al 1961 opstelln loten hett, liekers je „keeneen de Afsicht“ harr ehr to buun. Mit de Muuern un all den Wierdroht rund üm’t Land weer de DDR seeker vör’t imperialistische Utland. Vör allns is se seeker ween. Vör exotisched Oovt un Autos ut’n Westen, vör Musik ut alle Welt un noch veel mehr. 

Jo, man weer dor würkli för allns seeker – blots ni vör Muulwörp! 

Dor geev dat dormols je ganz ünnerscheedliche Oarten vun. Dor geev dat to’n een de Muulwörp mit twee Been, de Geheemnisse verroden hebbt mang Ost un West – Spione un Agenten hett man ehr nöömt. Un denn geev dat de lütten Muulwörp mit Fell un veer Been. Beide Oarten weern overs in Ünnergrund togang un af un to hebbt se sick ook mol ünner de Berliner Muuer dörkleiht. 

Dat de Ieser’n Vörhang full’n is, liggt dorüm no mien Ansehn blots an de Muulwörp – wohrschienli mehr an de mit twee Been, overs ook dat weet man hüüt ni mehr so genau. Un denn, zack, weer de Grenz open. Veellicht ward dat nu nochmol teihn Johr duuern, bet ut de twee Düütschlands een worrn is. Dat hett je ook 40 Johr duuert ehr ut’neen to klabüstern. Sowat bruukt Tied – in de een‘ Richtung jüst so as in de annere. Annerlei. Ick finn‘ liekers, dat de Muulworp ni dat Tier vun 2020, sünnern trückwürkend un dörgohn’d dat Tier vun 1961 bet 1989 ween schull. 1990 vun mi ut ook noch mit. De Muulwörp is de Politik nömli jümmers al annerlei ween. Un keeneen hett dat markt...

In düssen Sinn