Döschkassen Podcast

Football an‘ Golf

Sünndag is dat ennli sowiet: De Football-Weltmeisterschop geiht los. In Katar. Sogor een Dag fröher, dormit de Katrische Mannschop in’t erste Speel dorbi is.

Is je ook richti, de hebbt je so veele Million‘ an de Fifa betohlt, dat se de WM kriegt, dor mutt man ook mol fief groodt ween loten.

Böse Tungen kümmt je jümmers weller mit Kritik an dat Land un an den Afloop vun de WM üm de Eck. To’n Bispeel ward vun de Fruunrechte snackt. So dörft Fruun keen Minirock dreegen. Ehr Schullern un Knee mööt bedeckt ween. Na jo, Mannslüüd dreegt dor je ook keen Miniröcke. Un överhaupt schull man sick in Katar ’n beten bedecken, denn de Sünn dor in de Wüste an‘ Persischen Golf hett dat ganz scheun in sick.

Annere Länner, annere Sitten, ne. Ook för Mannslüüd: Kümmt dor ’n Mann mit dat Gesetz in‘ Tüddel, denn kann he sick dorop gefot‘ moken, wat mit de Pietsch to kriegen. Dat heuert sick twor an as in’t twölfte Johrhunnert, dorför sünd de Gerichte overs ni so överloopen.

Jo, Katar is ’n ganz annered Land. Dor dörft man in de Öffentlichkeit ook keen Alkohol drinken. Op de anner Sied: Besopen mit’n Beer in de Hand dör’n Stadtpark torkeln mutt je eegentli ook ni ween.

Overs dat hett je allns gor nix mit de WM to kriegen. Över de Katarer ward seggt, dat se de Buuarbeiders, de de Stadien ut’n Sand stampt, slecht behannelt un noch slechter betohlt.

Jo, overs dat heuert doch för’n WM-Gastgeever-Land dorto. In Südafrika hebbt se de Lüüd slecht behannelt, in Brasilien un in Russland jüst so. Un de rumänischen Gast-Buuarbeiders hebbt ook in Düütschland nix to Lachen hatt, as de WM hier ween is.

Dat mokt man so – ’n WM ohne Buuarbeiders, de slecht behannelt ward, is as Swattsuuer ohne Klüten.

Och jo, un denn sünd dor je noch de Klimaschützers, de seggt, dat all de Speelers un all de Toschauers, de mit’n Fleeger no Katar suust, veels to veel Kohlndioxid ruthaut. Dat is doch dumm‘ Tüch. Fleegers flücht doch mit Kerosin un ni mit Kohlndioxid. Man mutt sick ook mol informeern, eher man schimpt. Ick wünsch jedenfalls ’n scheune Football-WM un hoff, datt Jüm nu ni jedet Woort op de Waagschale leggt un de Pietsch rutholt…

In düssen Sinn

© Boyens Medien - Texte und Fotos sind urheberrechtlich geschützt.
Weiterverwendung nur mit Genehmigung der Chefredaktion.