DÖSCHKASSEN Podcast

Een Kreih hackt de anner...

Verrückte Herrschers hett dat je jümmers al geeven. Dor gifft dat veele Bispeele: Calligula, Ivan de Schreckliche un so. Mit Nooms as düsse kunn ick ohn‘ Problemen ’n ganze Sied vullschrieven.

Nu seggt man intwüschen je, dat de Minschheit opkloart is. Dat heet, an un vör sick schulln Verrückte dat je ni mehr schaffen an de Macht to komen. So ganz seeker bün ick mi dorbi overs ni. In Gegendeel: Mi schient dat wi jüst in de mächtigsten Länner jümmers weller mol Lüüd an de Spitz böörn doht, de ni so ganz sauber tickt. Achteran seggt wi denn: „Na jo, de is je demokratisch wählt, dorüm künnt wi em nu ni so eenfach dat Zepter ut de Hand nehm, weil de Gesetze dat ni toloten doht.“

Aha!? Jo, denn wurr ick seggen, dat wat mit de Gesetze ni stimmt. Dor mutt ’n frischen Pragraphen hen, wo binsteiht: „Wenn de Chef een an de Pann hett, denn ward dat heuchste Tied för ’n frischen Chef.“

Overs so opkloart sünd wi denn anschien’d doch ni. Kiekt man sick an wat de dorste Trump in Oogenblick weller vun sick gifft, denn fallt een je gor nix mehr in. He seggt je jümmers „Amerika toerst“. Dormit meent he overs „Eerstmol kom ick, denn ick un denn erstmol gor nix. Overs denn kümmt glieks Amerika.“

Nu will he de dat US-Militär ut Düütschland aftrecken, weil Merkel em in de USA mol de Meenung geigt hett. Dormit heuert Düütschland nu to de slimmsten Länner, de dat gift, tominst no Trump sien Meenung. Dorüm will he de Suldoten nu no Pol’n schicken. Dor hett he Russland beter op Sicht un de Poln hebbt je ook so scheune Gesetzte, besünners wat de Pressefrieheit angeiht. Dor gifft dat nömli keen „Fake News“.

De Türken mokt he Füüer ünnern Mors, weil de Raketen vun de Russen köfft un ni vun de Amis. Op de anner sied wurr he vun de Russen gern wat Schedderiged över siene Gegenkandidoten in Präsidentschopswohlkampf weeten. Asünsten döcht de Russen overs to nix. Hmm. Wo lang wüllt wi uns sowat noch mit ankieken. Na jo, veellicht sünd wi je intwüschen dör den ganzen Internet-Tüddelkrom all tosom verrückt worrn. Un een Kreih hackt de anner je keen Oog ut, ne...

In düssen Sinn