Geiht Rappen op Platt?
Meldorf Offener Kanal Westküste Mittwoch, 20. April 2022
De Rap-Workshop för Dithmarscher junge Lüüd mokt all Spoß, de mit vun de Partie sünd.
Twölv junge Lüüd hebbt in't Studio vun'n Open Kanal Westküst inne Gemeenschaftsschool in Meldörp een Rap-Workshop mokt, as Gemeenschafts-Projekt mit dat Zentrum för Nedderdüütsch in Holsteen un tohoop mit LPP 143, een plattdüütschen Rapper ut Kiel-Gaarden.
Rutkomen is een Weltpremiere, de wohrschienli eerste plattdüütsche Gangsterrap överhaupt. Maximilian, Julius, Laila, Mattis, Hanna, Marcel un Joris heet de Nowass-Rappers ut Meldörp un ümto, un ehr Story hett dat in sik. De beiden Gangsters Harald un Peter sünd in een Huus instegen. Se hebbt de Schandarms dicht op de Hacken. Peter hebbt se ok al bi de Büx kregen. Harald hett sik op'n Dachboden mang Kartons vergroven. Man bi een halsbrekerische Aktschoon ut’ Finster rut neiht he ut. Kann he weglopen?
De Antwort krigt een eerst to weten, wenn dat Stück ferdig is. Dat duert noch een lütt Wiel, denn dor mutt noch een beten an klütert warrn. Man denn kann man dat Stück in't Programm vun den Open Kanal Westküst un op de Homepage vun’t Zentrum för Nedderdüütsch in Holsteen ok anhören. Stütt kregen hett de Workshop vun de Kulturförderung vun’n Kring Dithmarschen. Richti veel Spoß mokt hett dat all, de mit vun de Partie weern. Un een Barg Deelnehmers kribbelt dat all in de Fingers - un mokt den negsten Hit.
