Eenfach de Beste

Wenn dat Elbeforum sick mit de Landfruen tosom deiht, kummt jümmer wat wunnerbores dorbi rut. Nu weer dat de Optritt vun Steffi Steup un de Danzdeerns. Grotortig, wat för een Stimmung de dorste Fru op de Bühne bringt. Vun de eerste Sekunn an harr se dat Publikum in Griff und dat weer ni bloots een Funke, de översprung is, dar weer dat reinste Füerwark. Leeder, de man ut de 80er un 90er Johrn kennt, hebbt aktuelle plattdütsche Texte kreegen.

To'n Biespeel dat Leed vun de Spider Murphy Gang mit den Skandol um Rosi, de nu ni mehr in'n Sperrbezirk arbeiten deit, sonnern ganz niemodsch in een call-center ehre Deenste anbeeden deit. De Nummer 32168 gifft dat denn wohl ook ni mehr. Vun Micheal Jackson öber Nena, Whitney Houston und Tina Turner geev dat veel to'n Lachen, ober ook to'n Nohdenken. Jümmers ünnerstütz von de Danzdeerns, de för jedes Leed een annere Kledosch an harrn, hett Steffi Steup dat Publikum ook mit ehre witzige Moderation begeistert. Tina Turner harr wohl secht: “Simply the best!“